Schowent vf die gruͤnen heide·
wie gar wunneklich si lit·
seht was liehter ǒgenweide·
vns hat braht des meien zit·
doch můs ich in sorgen sin·
ob mich lât in sendem leide·
dú vil liebú frowe min·
IN gesach bi minen iaren·
swc ich frowen han gesehen·
nie kein wib so wol gebaren·
des mv̊s ich fúr war wol iehen·
es ensi div mir den lib·
twinget vnd der sinnen varet
troͤste ein minnekliches wib·
Solde ich ir vil rôtem munde·
nigen so das mich ir grůs·
gar von herzeleide enbvnde·
seht so were mir truren bůs·
vnd ich wolde in froͤiden sin·
ob ich niht wan zeiner stvnde
kvste ir rôtes mv́ndelin·