Schowent an den gruͤnen walt·
was er lǒbes hat gerêret·
von des vngefuͤgen rifen val·
iarlanc sint die winde kalt·
winters kraft sich balde meret·
da von swiget aber nahtegal·
dú in maniger wise sanc·
lobelichen svͤsse doͤne·
in der svmerlichen schoͤne·
da der wol dur dc gras vf drang·
Min mv̊t swebt der svnnen ho·
mirst gebotten ich sol singen·
dc tůt miner selden wunsches tag·
ich wart vor des nie so fro·
von so herzelieben dingen·
dc ich wol von schulden sprechen mag·
dc si mir gebotten hat·
singen vnd fro beliben·
vnd ouch dienen reinen wiben·
dur si dú mir git den selben rât·
Ich sach einen roten munt·
also minneklich erlachen·
dc es in min sendes herze schos·
des froͤit ich mich sa zestunt·
si kvnde es so lieblich machen
dc mich dar zesehen nie verdros·
solt es iemer sin gewert·
vnd dc ich si solde schowen·
bi mir mines herzen frowen·
seht so were ich liebes wol gewert·
Was ir minneklicher lib·
kv́sche vnd rehter wibes gvͤte·
in ir herzen schrin beslossen hat·
ia si reine selig wib·
si hat zuht bi hohgemuͤte·
dc gebaren ir vil wol ich an stât·
got der was vil wol gemv̊t·
do er schv̊f so reinem wibe·
tugent wunne schoͤne an libe·
vnd vor allem wandel gar behv̊t·
Ach genade ein selig wib·
ach genade ein kúniginne·
ach genade ein suͤsse frowe min·
ach genade ein svͤsser lib·
lieb mins herze trost der sinne·
trut la mich in dinen hulden sin·
frowe hilf est an der not·
ach hIf la mich niht verderben·
sol ich niht genade erwerben·
an dir sost min trost gegen froͤiden tot·