Rlfen vnd winde kalt·
rǒbent ǒwe vnd ǒch den walt·
linde reret·
sus verkeret·
sich ein zit dú froͤide bar·
wan siht anger vnd den plan·
beide svnder blv̊men stan·
heide griset·
vf die riset·
tuftes vil des nam ich war·
da von swigent nahtegal·
winter wilde·
grôs vnbilde·
bruͤuet mit des snewes val·
Sit ich mich von erst versan·
wie sich minne lieben kan·
beiden liben·
mannen wiben·
do begvnde ich minne gern·
mich beduhte des an si·
wer mir minne stête bi·
mit gedanken·
âne wanken·
dc mich minne solte wern·
mit ir svͤssen meisterschaft·
min erkennen·
vnd wennen·
minne mit ir helfe craft·
Ich versen an minne mich·
so vert minne fluhteclich·
von mir balde·
ir gewalde·
ist min můt min sin zekranc·
minne tůt mich ivngen grâ·
vnd enweis doch rehte wa·
ich si vinde·
so geswinde·
ist ir wenden vnd ir wanc·
als ich wêne minne han·
mir erworben·
sost verdorben
als min werben vnd min wan·
Swie dc ich bin minne ein gast·
doch trage ich sweren last·
an dem herzen
minnen smerzen·
hant bekúnbert mir den můt·
alsus dulde ich minne quale·
stêteklichen svnder twale·
minne miden·
mv̊s ich liden·
doch weis ich dú minne ist gůt·
minne ist lieb ein fuͤgerin·
minne mvͤsse·
mit ir suͤsse·
lieben mich der frowen min·
Sol es mir so liebe ergan·
als ich mir erwúnschet han·
dc dú reine
wandels eine·
mir zetrost erbarmet sich·
so lern ich der froͤiden kvnst·
han ich miner frowen gvnst·
das ir sinne·
durh die minne·
minneklichen minnet mich·
so wurd ich nach liebe fro·
wan ir gvͤte·
min gemvͤte·
hoͤhet fúr die svnnen hô·