Richer got in welher mâsse wirt ir grůs·
swenne ich si sihe die ich da mide manigen tac·
sit der da heime wankes fúrhten mv̊s·
der doch sin lieb zerehter zit gegruͤssen mac·
da wil ich geniessen ir bescheidenheit·
vnd dc si vil wol wisse warvmbe ich si meit·
so tv̊t si wol vnd lit min trost vil gar daran·
dc stete herze an frúnde wenken niene kan·
Nieman lebt der sinen frúnt so dike siht·
er mvͤsse an in gedenken svnder sinen danc·
dc erzeiget herzeklicher liebe niht·
so ist vnser svmelicher beiten alzelanc·
dc ein wib ir stete an vns erzeigen mac·
gedenke ein frowe dc vnstete si ein slac·
gewinne ich nach der langen froͤmde schonen grv̊s·
wie sere ich dc mit dienste iemer me besorgen mv̊s·
Ist es war als ich genv̊ge hoͤre iehen·
dc losen hin ze den wiben si der beste rat·
we was heiles mac danne einem man geschehen·
der dc vnd allen valsch dvrh sine trúwe lat·
dc si vnd er vil stete sin an reinem sitte·
ia erwirbet er ein stetes heil da mitte·
so der vil gahelosen gehes heil zergat·
dc er an der vil gahelosen gehes fvnden hat·