Owe war vmbe volge ich alſo tvmbē wane·
der mich ſo ſere leitet in die not·
ich ſchiet vō ir aller froͤiden ane·
dc ſi mir troſt noch helfe nien gebot·
doch wart ir varwe lilien wis vn̄ roſen rot·
vn̄ ſas voꝛ mir dv́ liebe wol getane·
geblvͤt reht alſam ein voller mâne·
dc wc der ǒgen wunne vn̄ des herzen tot·
Min ſteter mv̊t gelichet niht dē winde·
ich bin noch als ſi mich hat verlan·
vil ſtete her vō einem kleinen kinde·
ſwie we ſi mir nv lange hat getan·
als ſwigende ie genôte· vn̄ ein verholner wan·
wie dike ich mich der toꝛheit vnd̾winde·
ſwanne ich voꝛ ir ſtan· vn̄ ſpꝛůche ein wunder vinde·
vn̄ mv̊s doch vō ir vngeſpꝛochen gan·
Ich han ſo vil geſpꝛochen vn̄ geſvngē·
dc ich bin mvͤde vn̄ heis vō der klage·
in bin vmbe nit wan vmb den wint betwūgen·
ſit ſi mir nit gelǒbet dc ich ſage·
wie ich ſi mīne vn̄ wie ich ir holdes h̾ze trage·
dewar mirn iſt nach w̾de niht gelvngē·
hete ich nach gote ie halb ſo vil gerungē
er nême mich zv̊ zim ach miner tage·