Owe ich armer wie sol ich nv werben·
sit ich ir niht enbieten sol min sendes klagen·
nv mv̊s ich leider swigende verderben·
wan ich ir minen kvmber niht mac selbe gesagen·
doch wil ich der trúwen niht verzagen·
ich en si ir holt also mv̊s ich sterben·
swiget der mvnt so wil ichs in dem herzen tragen·
Si moͤhte mich doch vnder wilent gruͤzen·
dc ir doch nieman verkerte als es ir gegen mir stat·
ich was gewon von ir worten vil svͤzen·
dc si mich grůste· nvn weis ich war vmbe sis lat·
ich en gelte das min herze si hat·
ze der besten erwelt dc wil ich gerne bvͤssen·
swenne min stete vnd ir ere vnd ir schoͤne zergat·
Min groͤste leit moͤhte si lihte wenden·
ein halbes wort dvhte mich von ir svͤz vnd gv̊t·
růchte si mir dc zegrůze senden·
da von wer ich iemer rich vnd hoh gemv̊t·
min edelú frowe ist so gar niht behv̊t·
si moͤhte mir die froͤide wol verenden·
vf ir genade mv̊s ich warten wenne sis tůt·