Owe ich armer wie ſol ich nv w̾ben·
ſit ich ir niht enbietē ſol min ſendes klagē·
nv mv̊s ich leid̾ ſwigēde verderben·
wā ich ir minē kvmb̾ niht mac ſelbe geſagē·
doch wil ich der trúwen niht verzagen·
ich en ſi ir holt alſo mv̊ſ ich ſt̾ben·
ſwiget d̾ mvnt ſo wil ichs in dem h̾zen tragen·
Si moͤhte mich doch vnd̾ wilēt gruͤzen·
dc ir doch niemā v̾kerte als es ir gegen mir ſtat·
ich waſ gewon vō ir woꝛten vil ſvͤzen·
dc ſi mich grůſte· nvn weiſ ich war vmbe ſis lat·
ich en gelte daſ mī h̾ze ſi hat·
ze der beſtē erwelt dc wil ich g̾ne bvͤſſen·
ſwēne mī ſtete vn̄ ir ere vn̄ ir ſchoͤne zergat·
Min groͤſte leit moͤhte ſi lihte wendē·
eī halbes woꝛt dvhte mich vō ir ſvͤz vn̄ gv̊t·
růchte ſi mir dc zegrůze ſendē·
da vō wer ich iem̾ rich vn̄ hoh gemv̊t·
min edelú frowe iſt ſo gar niht behv̊t·
ſi moͤhte mir die froͤide wol v̾endē·
vf ir genade mv̊ſ ich warten wēne ſis tůt·