Owe des ſcheidens des er tet·
vō mir do er mich vil ſenende lie·
wol aber mich der lieben bet·
vn̄ des weinēs des er do begie·
do er mich trurē lâſſen bat
vn̄ hies mich in froͤidē ſin·
vō ſinen trehenen wart ich nas
vn̄ erkv́lte ê doch das herze min·
Der dur ſine vnſeligheit·
iemer argeſ iht von ir geſage·
dem mvͤſſe alles weſen leit·
ſwas er mīne· vn̄ dc im wol behage·
ich flůche in vn̄ ſchadet in niht·
dvr die ich ir mv̊s froͤmde ſin·
als aber ſi min ǒge an ſiht·
ſo taget es in dem herzen min·
Owe was wiſſent ſi einem man·
d̾ nie frǒwē leit arg geſpꝛach·
vn̄ in aller erē gan·
dur dc mvͤt mich ſin vngemach·
dc ſi 78v in gruͤſſent vber al·
vn̄ zv̊ im redende gāt·
vn̄ in doch als einen bal·
mit boͤſen woꝛden vmbe ſlant·