Owe der ſo ſelig were·
der vns kvnde geben rat·
fúr die manigvaldē ſw̾e·
da div w̾lt mit vmbe gat·
owe ſo gemeiner ſoꝛgen·
wa hat froͤide ſich v̾boꝛgen·
die en vinde ich hie noch da·
Moͤht ich iender froͤide vinden·
da fvnde ich ǒch ere bi·
dvrh dc ſol ich niht erwindē·
ich envinde wa ſi ſi·
vn̄ erwirbe ich froͤide vn̄ ere·
wc bedarf ich ſelden mere
wie kan mir gelingē bas·
Rehter froͤidē ſwer der waldet·
d̾ hat iemer núwe ivgent·
ſo tv̊t ſoꝛge· dc man aldet·
vn̄ v̾derbet mange tvgent·
froͤide iſt ſuͤſſe ſoꝛge iſt ſv̂re·
ich wc ſoꝛgen nach gebure·
dú hat mir erleidet ſich·
Dvr dc ſol ǒch ich ſi leidē·
gůtē lútē ſwa ich kan·
mag ich ich wil vō ir ſcheidē·
vō ir ſin ein vꝛier man·
got voꝛ ſoꝛgē mih behuͤte·
dar zv̊ bit ich wibes gvͤte·
dc ir hv̊te mich bewar·
Gvͤtú wib ſvͤſſe vn̄ reine·
d̾ iſt noch wūd̾ 241v ſwa ſi ſîn·
hei funde ich der gv̊ten eine·
d̾ gebe ich dc h̾ze mîn·
ich wolde ir zehulden ſingen·
ir lop alſo hohe bꝛingē·
daſ ſis mvͤſe danken mir·
Got gebe dc ich ſi noh vinde·
d̾ gemvͤte ſi ſo gv̊t·
dc ſi ſich min vnderwīde·
mir zehohen minen mv̊t·
vinde ich die ſo vinde ich ere·
ſo getrur ich niem̾ mere
niemer wirde ich me vnfro·