Ob ich mich selben ruͤmen sol·
so bin ich des ein hoͤbischer man·
dc ich so manige vnfv̊ge dol·
so wol als ich gerechen kan·
ein klosener obers vertruͤge· ich wene er nein·
hat er die stat als ich si han·
bestvͤnde in danne ein zornelin·
es wurde vnsanfte widertan·
swie sanfte ichs also lasse sin·
da vnd ǒch me vertrage ich doch dvr etteswas·
FRowe ir sit schoͤne vnd sit ǒch wert·
den zwein stet wol genade bi·
wc schadit iv dc man úwer gert·
so sint ie doch gedanke 134v vri·
wan vnd wunsch dc wolde ich alles ledic lan·
was mac ichs hoͤfeschent mine sinne dar·
was mac ich gebentsiv minen sanc·
des nement ir lihte niender war·
so han ichs doch vil hohen danc·
treit úch min lob zehove das ist min werdekeit·
Frowe ir habt mir geseit also·
swer mir beswere minen mv̊t·
dc ich ǒch den mache fro·
er schame sich lihte vnd werde gůt·
dú lere ob si mit trúwen si dc das schine an iv·
ich froͤwe úch ir besweret mich·
des schamt úch ob ichs reden getar·
lat úwer wort niht velschen sich·
vnd werdet gv̊t so habt ir war·
vil gv̊t sit ir da von ich gv̊t von guͤte wil·
Frowe ir habet ein werdes tach·
an úch geslǒfet den reinen lip·
wan ich nie besser kleit gesach·
ir sit ein wol gekleidet wib·
sin vnd selde sint gestemphet wol dar in·
getrageniv ich nie genan·
dis neme ich als gerne ich lebe·
der keiser wurde ir spilman·
vmb also riche gebe·
da keiser spil nein herre keiser anderswa·