Ob ich mich ſelben ruͤmē ſol·
ſo bin ich des ein hoͤbiſcher man·
dc ich ſo manige vnfv̊ge dol·
ſo wol als ich gerechen kan·
ein kloſener obers v̾truͤge· ich wene er nein·
hat er die ſtat als ich ſi han·
beſtvͤnde in danne ein zoꝛnelin·
es wurde vnſanfte widertan·
ſwie ſanfte ichs alſo laſſe ſin·
da vn̄ ǒch me v̾trage ich doch dvr etteſwas·
FRowe ir ſit ſchoͤne vn̄ ſit ǒch wert·
den zwein ſtet wol genade bi·
wc ſchadit iv dc man úwer gert·
ſo ſint ie doch gedāke 134v vꝛi·
wan vn̄ wunſch dc wolde ich alles ledic lan·
was mac ichs hoͤfeſchent mine ſinne dar·
was mac ich gebentſiv minen ſanc·
deſ nement ir lihte niender war·
ſo han ichs doch vil hohen danc·
treit úch min lob zehove das iſt min werdekeit·
Frowe ir habt mir geſeit alſo·
ſwer mir beſwere minē mv̊t·
dc ich ǒch den mache fro·
er ſchame ſich lihte vn̄ w̾de gůt·
dú lere ob ſi mit trúwē ſi dc das ſchine an iv·
ich froͤwe úch ir beſweret mich·
des ſchamt úch ob ichs reden getar·
lat úwer woꝛt niht velſchē ſich·
vn̄ werdet gv̊t ſo habt ir war·
vil gv̊t ſit ir da von ich gv̊t vō guͤte wil·
Frowe ir habet ein w̾des tach·
an úch geſlǒfet den reinē lip·
wan ich nie beſſer kleit geſach·
ir ſit ein wol gekleidet wib·
ſin vn̄ ſelde ſint geſtēphet wol dar in·
getrageniv ich nie genan·
dis neme ich als g̾ne ich lebe·
der keiſer wurde ir ſpilman·
vmb alſo riche gebe·
da keiſer ſpil nein herre keiſer anderſwa·