Nv sage an svmer war wilt dv den winter hin fliehen·
gerůchest dv sin gerne ich leiste dir geselleschaft·
ich wil mich von minen vplichen sange ziehen·
min wider winde sint mit dem tieuel haft·
die enlassent mir an minem liebe niht gelingen·
dc ist ein schade bi der scham·
Giselbolt vnd ingrame·
die leident mir min singen·
Die selben zewene gehellent hin nah engelmaren·
der gewalteklichen friderunen ir spiegel nam·
tretzic vnd hoͤnic sintz an allen ir gebaren·
dc in da mikenfrit vnd v̊tzman· der reide·
die zwene dringent mich hin dan·
gewunnest dv einen tvmben wan
gegen in dc wer mir leide·
Svmer ich verklage niemer din manig zier·
da vns dirre kalte winter von gedrungen hat·
mich verdringent aber geiler dorf rúchel vier·
von der wol getanen dú mich singens niht erlat·
ich en mvͤsse singen swenne halt mir dv́ gv̊te lone·
als der liebe genade sin·
frowe nv tů genade schin·
vor vnser tage none·
Min tage lǒfent von der hoͤhe vf die neige·
frowe troͤste mich die wile ich vf der hoͤhe ste·
ob ich dir mit rehter stete herzen trúwe zeige·
so schaffe dc ir boͤser wille iht an mir erge·
min swere sint von dinen schulden manigvalt·
der schaffe ein ende selig wip·
e das min vil tvmber lip
in senden sorgen alt·
Je lenger vnd ie lieber ist si mir dú wolgetane·
e· leider vnd ie leider bin ich ir dc ist min leit·
bin ich fro dc kumt von einem herzelieben wane·
sit si mir ir genade wider seit·
trostes vnd gedingen wil ich niemer werden ane·
trostes ich noch nie vergas·
do dú schone vor mir sas
alsam ein voller mane·