Nv ist des meien schoͤne·
wan hoͤret svͤsse doͤne·
die werden zit ich kroͤne·
der winter wil zergan·
er ist vil gar geswachet·
der liebe svmer machet·
dc dvr den kle nv lachet·
manig blůme wol getan·
nv stat bekleit dú heide·
mit wunneklicher wat·
si ist worden fri vor leide·
mit liehter ǒgenweide·
manig anger schone stât·
Owe hete ich hulde·
von der ich kvmber dulde·
des wunsches vbergulde·
lit an der frowen min·
si ist ganzer tvgende ein krône·
vnd pfligt ir zúhte schone·
solde ich ir svͤssem lône·
so lange froͤmde sin·
so sage ichs iv fro minne·
dc ich an iv verzage·
ich verlúre gar die sinne·
nv helfent kúniginne·
von senelicher klage·