NV ist der walt· wol bekleidet vberal·
vnd dú heide ist maniger hande varwe riche·
manicvalt ist der kleinen vogelin schal·
berg vnd tal gezieret stânt gar wunnekliche·
die der kalde winter mit gedrange·
húre iemerlichen twanc·
kranc· ist nv sin twingen froͤit úch ivnge vnd alt·
Steten has treit dú selderiche mir·
der ich dienen mv̊s âne allen valsch besvnder·
ich bin las· an dien froͤiden min dc ir·
niht min dienst wol behaget dc ist ein wunder·
minne woldest dv dich noch bedenken·
dc ir guͤte trôste mich·
rich· an froͤiden wolde ich sin beschehe das·
Dise not· fuͤget mir dc ich mv̊s klagen·
von der lieben dú mir hohgemvͤte krenket·
ich bin tot· steten kvmber mv̊s ich tragen·
we dc sich dú minnekliche niht bedenket·
dú mich nach ir minnen lât verderben·
we warvmbe tůt si dc·
bas· ir zême dc mich kvste ir mvnt so rot·