Nv iſt der arge wint̾ hie·
der vns wil betwingē aber leider
die blv̊mē vn̄ dē kle·
owe der zerfuͤrt vns ie·
meien ſinú wūneklichē kleider·
ich ſoꝛge wies erge
wiſſent ſwer den wint̾ lang
alſo mv̊s v̾triben·
ane liebē vmbevanc·
wie mag der belibē·
ſin froͤide w̾de kranc·
Liep gedinge tv̊t mich geil·
ich gewīne heil·
Owe lieblich naher ſmvk·
owe mīnekliches vmbevahē·
vn̄ owe guͤtlich kvs·
owe herzeklicher dꝛuk·
wēne ſol ich ſender den enphahē·
ioch ſinge ich vmbe ſus·
doch gedinge ich dc ir můt·
vn̄ ir wiblich gvͤte·
dú mich froͤlich ſingē tv̊t·
hoͤhe min gemvͤte·
ſi iſt ſo rehte gv̊t·
Liep gedinge tuot mich geil·
ich gewīne heil·
Wer geſach ie frowē lip·
d̾ ir lachē alſo wol gezeme·
vn̄ ir vil werder grůſ·
es iſt manig ſchone wib·
dú doch niend̾ iſt alſo geneme·
des man ir ſpꝛechē mv̊ſ·
ſwēne ir roſeroter mvnt·
vn̄ ir liehtē ǒgē
blikent ī mins h̾zen grunt·
lachelichē tǒgē·
ſo wirde ich wol geſvnt·
Lieb gedinge tůt mich geil·
ich gewīne heil·
Wol dir mīnēklichv́ fruht·
wol dir dv haſt froͤiderich gemvͤte·
vn̄ doch mit reht̾ ſcham·
wol dir dv haſt wiblich zuht·
wol dir dv haſt vſerwelte gvͤte·
mit rehter kúſche alſam·
wol dir dú biſt vſerkoꝛn·
liep vn wādelb̾e·
wol dir wā dv biſt ver zoꝛn·
vn̄ fúr ſende ſw̾e·
an diſe w̾lt erboꝛn·
Liep gedīge tuot mich geil·
ich gewīne heil·
We warvmbe tv̊t ſi dc·
dc ſi mir dc h̾ze niht enbindet·
von ſender arbeit·
ſich̾lich ir ſtuͤnde bas·
ſit ſi mich· ſo ſigeloſen vindet·
dc ſi min ſendú leit·
vf genade rieme an ſich·
doch ī liebē troſte·
alſo dc dú gv̊te mich·
vō dē bandē lôſte·
ſo lepte ich wūneklich·
Liep gedinge tuot mich geil·
ich gewīne heil·