Nv hilf wibes gvͤte·
mir ist not der helfe din·
mir wil hohgemvͤte·
sterben in dem herzen min·
wibes gvͤte dv bist gůt·
hilt dc iht verderbe
so iemerlich min hoher mv̊t·
Swa man saget dc mere·
das min lip gevangen lit·
dc ist den frowen swere·
wan dien diene ich mine zit·
swelhú wiblich gvͤte hat·
ich weis wol min kvmber
ir ze herzen nahe gat·
Von swem mich verliesent·
guͤtú wib der habe fúr war·
die schulde si verkiesent
niemer innekliche gar·
dc ist reht· es ist also·
sit ich bin ir leides
trurig vnd ir eren fro·
Miner frowen guͤte·
vnd ir lieplich schoner lip·
nert mir hohgemvͤte·
durh si ere ich ellú wip·
dc hat si verschuldet· wol
dc ich dur ir ere
allen frowen diene sol·
Dem vil werden wibe·
mv̊s man hoher tvgende iehen·
an ir svͤssen libe
wart vnwibheit nie gesehen·
si ist schoͤne si ist gv̊t·
kúnne blide stete
zůhterich wiblich gemv̊t·
Roter danne ein rose
ist ir mvnt· svͤsse vnd heis·
si ist mit zúhten lôse·
schoner wib ich niender weis·
brvn ir bra wie ir lip·
von geburte ein frowe·
ist si vnd von tvgenden wip·
Kúschlich smieren lachen·
kan ir vel roter munt·
si kan suͤsse machen·
ir geberde zallet stvnt·
ir mvnt vnd ir ǒgen liht·
so mich dv́ an sehent
hohes mv̊tes man mich siht·