Niden· liden·
mv̊z dú reine·
dur ir minneklichen lib·
schelten gelten·
kan si kleine·
sit ir weder man noch wib·
arge warheit mac gesprechen·
si ist selden svnder trútel·
in der wurze garten kan si brechen·
ir rosen ir blv̊men ir tvgentfrúhtig krútel·
Svͤze gruͤze·
kan si teilen·
minneklichen vmbe sehen·
minne· sinne·
wil dem geilen·
dem si liebe wil veriehen·
vnd im die mit trúwen kúndet·
da ist wunsch vnd niender breste·
wan es froͤide in frúndes herze enzúndet·
dú vlogzet gelich dem zitvogel in dem neste·
Ringe· swinge·
sin gemvͤte·
der der minne dienen wil·
swere· mere·
swent ir guͤte·
si gir kurzewile vil·
so dc herze dǒgen leret·
sines frúndes ǒgen luken·
mv̊t ze mv̊te sin gegen sinne keret·
ir wehsel gedenken das kan sich nahe smvken·
Lerne· gerne·
wol gevallen·
reinen wiben ivnger man·
eine· meine·
vor in allen·
so verst vf gelúkes ban·
vnd ǒch in der selden hv̊te·
vnpris der wirt dir wilde·
gv̊t wib in eines ivngen mannes mvͤte·
dú entwirfet dem sinne vil tvgentlichú bilde·
Frowe· schǒwe·
ivnge lúte·
merke wen bescheidenheit·
ere· lere·
sich den trúte·
kvnne er sin mit zuht gemeit·
vnd ǒch minne steln tǒgen·
der mag dir froͤide bringen·
swinge im liebe gerndes sinnes ǒgen·
so lernet din wúnschel gedenken froͤlich springen·