Nemet frowe disen kranz·
also sprach ich zeiner wol getaner maget·
so zieret ir den tanz·
mit den schonen blv̊men als irs vfe traget·
het ich vil edel gesteine·
dc mvͤst vf ir hǒbet·
ob ir mirs gelǒbet·
sent mine trúwe dc ich es meine·
FRowe ir sit so wolgetan·
dc ich ú min tschapel gerne geben wil·
dc aller beste dc ich han·
wisser vnd roter blv̊men weis ich vil·
die stent so verre in iener heide·
da si schone entsprvngen·
vnd die kleine vogel svngen·
da svln wir si brechen beide·
Si nam das ich ir bot·
einen kinde vil gelich dc ere hat·
ir wangen wurden rot·
sam dú rose da si bi den lilien stat·
des erschamten sich ir liehten ǒgen·
do neig si mir vil schone·
dc wart mir zelone·
wirt mirs iht mer dc trage ich tǒgen·