Nemet frowe diſen kranz·
alſo ſpꝛach ich zeiner wol getaner maget·
ſo zieret ir den tanz·
mit den ſchonen blv̊mē als irs vfe traget·
het ich vil edel geſteine·
dc mvͤſt vf ir hǒbet·
ob ir mirs gelǒbet·
ſent mine trúwe dc ich es meine·
FRowe ir ſit ſo wolgetan·
dc ich ú min tſchapel gerne gebē wil·
dc aller beſte dc ich han·
wiſſer vn̄ roter blv̊mē weis ich vil·
die ſtent ſo verre in iener heide·
da ſi ſchone entſpꝛvngen·
vn̄ die kleine vogel ſvngē·
da ſvln wir ſi bꝛechen beide·
Si nam das ich ir bot·
einē kinde vil gelich dc ere hat·
ir wangē wurdē rot·
ſam dú roſe da ſi bi dē lilien ſtat·
des erſchamten ſich ir liehten ǒgen·
do neig ſi mir vil ſchone·
dc wart mir zelone·
wirt mirs iht mer dc trage ich tǒgen·