Mir iſt leide·
das der winter beide·
walt vn̄ ouch die heide·
hat gemachet val·
ſin betwingen·
lat niht blůmen entſpꝛingen·
noch die vogel ſingen·
ir vil ſuͤſſen ſchal·
alſus verderbet mich ein ſelig wib·
dú mich lat·
ane rat·
den ſi hat·
des zergat·
an froͤiden gar min lip·
Miner ſwere·
ſchiere ich ane were·
ſolde ich die ſeldebere·
ſchowen ane leit·
dú vil here·
hat ſchoͤne zuht vn̄ ere·
der wnſch vn̄ dannoch mere·
iſt gar an ſi geleit·
roſe wengel mv́ndel rot ſi hat·
val har lang·
kele blank·
ſiten kranc·
min gedanc·
an ir vil hohe ſtat·
Jch wil ſingen·
mere vf gv̊t gedingen·
ſol mir wol gelingen·
das mv̊s an ir geſchehen·
ſi kan machen·
trurig herze lachen·
groſſe ſoꝛge ſwachen·
des mv̊s man ir iehen·
wurde mir ir werder troſt geſeit·
ſeht fúr war·
offē bar·
minú iar·
wolde ich gar·
mit froͤiden ſin gemeit·