Ich clage niht blůmen noch den kle·
ich clage niht wnnecliche tage·
ich klage ein ander schulde·
ich clage mir ist nach gv̊te we·
dc ist vor aller not min clage·
die ich vnsanfte dvlde·
gv̊t wil an froͤiden mich verhern·
wolde aber mich dú gv̊te nern·
so wer ich rich gebe mir dú schone ir hulde·
Mir ist niht lieber danne gv̊t·
des wil ich niemer mich geschamen·
swa mans seit zemere·
swie selten es mir liebe tůt·
doch minne ich es durh sinen namen·
gv̊t ist vnwandelbere·
nv merkent was ich heisse gv̊t·
des doch vil maniger niht entůt·
min frowe ist gv̊t bi der ich gerne were·