Mir iſt húre wider varn ein ſelikeit·
ich kom da ich ein trut ivnger wibe vant an einē virtage·
deſ wart ich wol inne es wc den kindē leit·
dc ich alſo ſeltē kom zv̊ in gegan des hetenſ alle klage·
zv̊ einer ſpende kom ich wir 278r waren da gemein·
vō haſelnuſſē mv̊ſt ich do ze ivngeſt gebē zwo fúr ein·
Dú eine ſpꝛach ich wil iv minen zinzel geben·
us miner hant in úwer hant ir ſvlt mich wern ob mir ſin got geſage·
ich ſpꝛach frowe wiſ ane angſt ſvl wir lebē·
dv ſihſt dc ich dich will weren an alle klage·
wer da niemā wan wir zwei ſo wert ich dich vil ſchone·
ſi dc ich dir ſin iht behabe la mich ſin engeltē an minē lone·
Ich kom eines moꝛgēs da ich ſi aleine vant·
ich ſpꝛach vꝛowe ich wil dich werē vn̄ niht behabē des·
nv her ſpꝛach ſi zehant·
do ſpilt wir ich weis wol weſ·
ſi greif mir an min oꝛe·
hei heý ſpꝛach ſi do
ia wenne ich gewūnē han ich bin niht úwer toꝛe·