Mir ist húre wider varn ein selikeit·
ich kom da ich ein trut ivnger wibe vant an einem virtage·
des wart ich wol inne es wc den kinden leit·
dc ich also selten kom zv̊ in gegan des hetens alle klage·
zv̊ einer spende kom ich wir 278r waren da gemein·
von haselnussen mv̊st ich do ze ivngest geben zwo fúr ein·
Dú eine sprach ich wil iv minen zinzel geben·
us miner hant in úwer hant ir svlt mich wern ob mir sin got gesage·
ich sprach frowe wis ane angst svl wir leben·
dv sihst dc ich dich will weren an alle klage·
wer da nieman wan wir zwei so wert ich dich vil schone·
si dc ich dir sin iht behabe la mich sin engelten an minem lone·
Ich kom eines morgens da ich si aleine vant·
ich sprach vrowe ich wil dich weren vnd niht behaben des·
nv her sprach si zehant·
do spilt wir ich weis wol wes·
si greif mir an min ore·
hei heý sprach si do
ia wenne ich gewunnen han ich bin niht úwer tore·