Mir ist dú ere vnmere·
da von ich ze iare wurde vnwert·
vnd ich klagende were·
we mir armen húre dis wc vert·
also han ich mangen kranz verborn·
vnde blv̊men vil verkorn·
so breche ich rosen wunder wan der dorn·
Swer sich so behaltet·
dc im nieman niht gesprechen mac·
wunnekliche er altet·
im en wirret niht ein halber tac·
der ist fro swenne er zetanze gat·
swes herze vf ere stat·
we im des sin geselle vnere hat·
Wan sol iemer fragen·
von dem man wie es vmb sin herze ste·
swen des wil betragen·
der enrůchet wie dú zit zerge·
maniger schinet vor den froͤmden gůt·
vnde hat doch valschen mv̊t·
wol im zehoue der heime rehte tůt·