Mir ist als ich niht lebende si swenne ich entnvke sere·
da von den tot betútet mir der slaf mit siner lere·
bi der svnnen kere· bezeichent mir der schatte min·
dc im gelich zergat min leben ǒch wirt ich bi der hitze·
der helle ermant swenne ich in einer batstuben gesitze·
bi der blůmen glitze· spúr ich vnsteter blůmen schin·
in dem spiegel ich erkenne dc ich esche bin als er·
so kan mir ǒch der gerner· mit den gebeine kv́nden·
dc mich die wúrme nagende werdent mit vnreinen mv́nden·
wil ich da bi niht hvͤten mich vor allen hǒbetsv́nde·
in der helle grúnden· mv̊s ich an ende qvelnde sin·
So we mir tvmber das mich iemer langer tage verdrússet·
vnd miner iare vrist enweg so rehte balde schú̂sset·
dc ein bach niht flúzet· so drate vs velse noch vs hage·
ich wúnsche dike dc dú stvnde werde mir gekúrzet·
vnd ist si doch vf einen gehen lǒf also geschúrzet·
dc darinne erstúrzet· geswinde sich min lebetage·
ia klage ich min gelt dc ich verzer vnde klage niht minú zit·
die mir nieman wder git· swenne ich si gar verlúre·
vertet ich verne gůt ich mag gewinnen anders húre·
verswende ich aber minú iar dú sint mir iemer túre·
von dekeiner stúre· vertane zit ich wider beiage·