Minlich vnd gv̊t·
hv́bsch vnd reiner sinne·
ist si vnd wol gemv̊t·
die ich mit trúwen minne·
si ist kv́niginne·
in mines herzen grunt·
da si bestêt ist inne·
nv vnd ǒch zaller stunt·
Frúntlich bevangen·
hat mich ein roter mvnt·
vnd zwei liehtú wangen·
da bi ein kele runt·
Noch wurde ich gesvnt·
troste mich dú minnekliche·
dv́ mich hat verwunt·
ach genade tvgende riche·
ich mv̊s sicherliche·
sterben in kurzer stunt·
mir werde genedekliche·
danne úwer gvͤte kvnt·
Frúntlich bevangen·
hat mich ein roter mvnt·
vnd zwei liehtú wangen·
da bi ein kele runt·
Liehtú ougen klar·
minneklich ein lieblich kinne·
tv̊nt mich sorgen bar·
ach genade kv́niginne·
in sender not ich brinne·
nach úch in aller stvnt·
helft mir dc ich gewinne·
trost miner selden fvnt·
Frúntlich bevangen·
hat mich ein roter mvnt·
vnd zwei liehtú wangen·
da bi ein kele runt·