Minlich vn̄ gv̊t·
hv́bſch vn̄ reiner ſinne·
iſt ſi vn̄ wol gemv̊t·
die ich mit trúwē minne·
ſi iſt kv́niginne·
in mines herzen grunt·
da ſi beſtêt iſt inne·
nv vn̄ ǒch zaller ſtunt·
Frúntlich bevangen·
hat mich ein roter mvnt·
vn̄ zwei liehtú wangen·
da bi ein kele runt·
Noch wurde ich geſvnt·
troſte mich dú mīnekliche·
dv́ mich hat v̾wūt·
ach genade tvgende riche·
ich mv̊ſ ſicherliche·
ſterbē in kurzer ſtunt·
mir w̾de genedekliche·
danne úwer gvͤte kvnt·
Frúntlich bevangen·
hat mich ein roter mvnt·
vn̄ zwei liehtú wangen·
da bi ein kele runt·
Liehtú ougē klar·
mīneklich ein lieblich kinne·
tv̊nt mich ſoꝛgen bar·
ach genade kv́niginne·
in ſender not ich bꝛinne·
nach úch in aller ſtvnt·
helft mir dc ich gewinne·
troſt miner ſeldē fvnt·
Frúntlich bevangen·
hat mich ein roter mvnt·
vn̄ zwei liehtú wangen·
da bi ein kele runt·