Min herze den gelǒben hat·
solt ich oder iemer man beliben sin·
durh liebe oder durh der minnen rat·
so wer ich noh alvmbe den rin·
wan mir dc scheiden nahe gat·
dc ich von lieben frúnden min·
han getan swies doch darvmbe ergat·
herre got vf die genade din·
so wil ich dir bevelhen die·
die ich dur dinen willen lie·
Ich gvnde es gv̊ten frowen niet·
dc iemerme kome der tac·
dc si den heten lieb der von vns schiet·
wan es wer ir eren slac·
wie kvnde in der gedienen iet·
der gottes verte also erschrac·
darzv̊ sende ich in disú liet·
vnd gruͤsse si als ich beste mac·
gesehe si min ǒge niemerme·
mir tete doch ir laster we·