Min dienst der ist alzelanc·
bi vngewisseme wane·
nach der ie min herze ranc·
dú lat mich trostes ane·
ich moͤhte in klagen
vnd vnder sagen·
von meniger zit·
sit ir erkande ir strit·
sit ist mir gewesen fúr war·
ein stvnde ein tac ein tac ein woche ein woche ein ganzes iar·
We was tete si einem man·
dem si doch vient were·
sit si so wol verderben kan·
ir frúnt mit maniger swere·
mir tete bas
des riches has·
io moͤhte ich eteswar·
entwichen siner schar·
dis leit wont mir alles bi·
vnd nimt von minen froͤiden zins als ich sin eigen si·