MIn alte swere die klage ich fúr núwe·
wan si getwanc mich so harte nie me·
ich weis wol dvrch wc si mir tůt so we·
dc mich sin verdriesse vnd dú not mich gerúwe·
die ich hate vf trostlichen wan·
nein ine mac noh enlat·
mich min trúwe·
swie schiere vns aber dú svmer zit zerge·
des wurde rat·
mvͤse ich ir hulde han·
die neme ich fúr lǒp vnd fúr kle·
Ich getar niht vor den lúten gebaren·
als es mir stat duhtes ir einen gůt·
da bi sint viere den min leit sanfte tůt·
boͤse vnd gůte gescheiden ie waren·
der sitte mvͤsse ǒch lanc stete sin·
ir beider willen kan·
nieman gevaren·
wan er ist vnwert swer vor nide ist behv̊t·
si haben dan·
dc ir vnd lassen mir dc min·
vnd sweme da gelinge der si wol gemv̊t·