Mich nimet iemer wnder was ein wip·
an mir habe ersehen·
das ir zǒber leit an minen lip·
was ist ir geschehen·
si hat ǒch ǒgen·
wie kvmet das als v́bel gesiht·
ich bin aller manne schoͤnest niht·
das ist ane lǒgen·
Habe ir ieman iht von mir gelogen·
so beschǒwe mich bas·
si ist an mir schone gar betrogen·
si wil anders niht wan
wie stat mir min hǒbet·
das enist nit ze wol getan·
si betrúget lihte ein tvmber wan·
ob sis nit gelǒbet·
Da si wônt da wonent wol tvsent man·
die vil schoͤner sint·
wan das ich ein lúzel zv̊ge kan·
so ist min schoͤne gar ein wint·
fv̊ge han ich kleine·
doch ist si gemeine·
so das si vil luten sol
iemer sin gemeine·
Wil si fůge fúr die schoͤni nemen·
so ist si vil wol gemv̊t·
kan si das so mv̊s ir wol gezemen·
swas si mir getv̊t·
so wil ich mich neigen·
vnd alles das si wil·
was bedarf si denne zǒbers vil·
ich bin doch ir eigen·
Lat v́ch sagen· wie es vmbe ir zǒber stat·
des si wnder treit·
si ist ein wip dv́ schoͤne vnd ere hat·
da bi liep vnd leit·
das si iht anders kvnne·
das sol man gar verheln·
wan das ir wnnekliches leben·
machet sorge vnd wnne das ist ir leben·