Mich hat ein wunneklicher wan·
vnd ǒch ein lieber frúndes trost·
in senelichen kvmber braht·
sol der mit froͤide an mir zergan·
sone wirde ichs anders niht erlost·
es enkome als ich mirs han erdaht·
vmb ir vil minneklichen lip·
dv́ mir enpfroͤmdet ellú wib·
wan dc ich si alle durh si eren mv̊s·
ione ger ich anders lones niht von ir dekeiner wan ir grůs·
Mit valscheloser gvͤte lebt·
ein man der mir wol iemer mac·
gebieten swc er wil·
sin stete mir froͤide gebt·
wan ich sin vil schone enpflag·
dc kvmt von grosser liebe vil·
mir ist an im des mv̊s ich iehen·
ein schoͤnes wibes heil geschehen·
dv́ selde wirt vns beiden schin·
sin tvgent hat im die besten stat erworben in dem herzen min·
Die mine froͤide hat ein wib·
gemachet stete vnd endelos·
von schulden al die wile ich lebe·
genade sůch ich an ir lip·
enpfahe ich wunneklichen trost·
der mac wol heissen frúndes gebe·
ein mannes heil mir da geschach·
da si mit rehten trúwen sprach·
ich mvͤste ir herzen nahe sin·
svs darf es nieman wunder nemen ob ane sorge lebt das herze min·