Meijen schin· din kunft mich froͤit vil kleine·
swie din blůt lúchtet so·
mir tůt bas das mich dú liebe reine·
zaller stunt machet vro·
si mag mir wol bringen
gruͤnen kle blv̊men glast·
voglin singen·
die heide wunnenklichen stat lǒbes me danne tusent last·
Also zart wart nie kein lip· werliche ist
an ir ichtes icht·
es en si vrî· wandels sunderliche·
nein es zware nichtes nicht·
nieman kan vol trúwen
also rot ist ir munt
mich můs rúwen·
das ich nicht en můs vor ir sten zaller stunt·
Lassa mich dich liebes lieb erbarmen·
ich bin vertriben weist dv das·
halt mich dar· war· in dinen blanken armen·
vf min recht· nicht fúrbas·
alder welte droͤwen·
acht ich nicht kumtz dar zv̊·
wiltú mich froͤwen·
das ich nie wart so vro so sprich ich wil es tů·