Meijen ſchin· din kunft mich froͤit vil kleine·
ſwie din blůt lúchtet ſo·
mir tůt bas das mich dú liebe reine·
zaller ſtunt machet vro·
ſi mag mir wol bꝛingen
gruͤnen kle blv̊men glaſt·
voglin ſingen·
die heide wunnenklichen ſtat lǒbes me danne tuſent laſt·
Alſo zart wart nie kein lip· werliche iſt
an ir ichtes icht·
es en ſi vrî· wandels ſunderliche·
nein es zware nichtes nicht·
niemā kan vol trúwen
alſo rot iſt ir munt
mich můs rúwen·
das ich nicht en můs voꝛ ir ſten zaller ſtunt·
Laſſa mich dich liebes lieb erbarmen·
ich bin vertriben weiſt dv das·
halt mich dar· war· in dinen blanken armen·
vf min recht· nicht fúrbas·
alder welte droͤwē·
acht ich nicht kumtz dar zv̊·
wiltú mich froͤwen·
das ich nie wart ſo vro ſo ſpꝛich ich wil es tů·