Marke dv versink·
din lant ist vneben·
ich vnd manig flemink·
mv̊s hie vnsanfte leben·
der da heime wol tútschú buͤchel las·
der mv̊s riten vmbe fůter vnd gras·
in rúwet sere dc er da heime niht en was·
Bischof eberhart nv rume es hie·
dc dirs vergelte got·
ein wib ich heime lie·
dú ist ein toͤrschú krot·
die vberret vil lihte ein ander man·
ia garnet si es verhenget sin ir an·
vnd rúwet mih dc ich si ie gewan·
Dis ist ein reinú vart·
die wir gegen beiern tůn·
bischof eberhart·
nv si ein stetú sv̊n·
sit ich der marke den rugge han gekert·
des bat ich got nv hat er mich sin gewert·
das vngemach trǒmte miner matzen vert·