Maniger klaget die schonen zit·
vnd die liehten tage·
so klage ich dc mir ein wib getv̊t·
dú mir leit zv̊ sorgen git
owe· dirre klage·
wc ist mir fúr sendes trvren gv̊t·
aller vogel singen aller blv̊men schin·
ellú wib vnd wibes kint·
swc der lebende sint
troͤstent mich niht wan so dc sol sin·
Mich hat leit in truren braht·
vnd ein sende klage·
dú mich niht wan truren leren wil·
mir hat lones vngedaht·
der ich mine tage·
habe gedienet vs der masse zil·
wer sol mir nv lonen vnd gelit si tot·
geschiht des niht vnd stirbe aber ich·
frowe min nv sprich·
vf wen erbe ich danne dise not·
Hilf hilf gv̊t wib la besehen·
ob dv brechen maht·
sorgen bant min froͤide hinket dran·
mir mag lieb von dir beschehen
dar zv̊ hast dvs braht·
dine guͤte bitte ich vnd man·
manlich dienst wiblich lon gelich ie wag·
wan an dir vil selig wib·
kumber treit min lip·
die vernanten zit naht vnd tag·