Lieber meie nv ist din schoͤne·
aber leider gar zergan·
vnd der kleinen vogelin doͤne·
wenne hebent si nv an·
nahtegal ir svͤssen sanc·
er wil komen zornlichen der vns vert die blv̊men twanc·
Sol ich nv ane lon beliben·
so mv̊s ich klagen ander not·
dú wol truren mac vertriben·
mit ir svͤssen mvnde so rot·
dv́ verderbet mir den lip·
frowe ir twinget niht so sere ah la sten vil selig wib·
Ich mv̊s eines noch gedenken·
da von leid ich vngemach·
da von ich ir mv̊ste wenken·
vnd mir liebes niht geschach·
da verlos ich vreuden trost·
noch hat mich dv́ minnekliche von senden sorgen niht erlost·
Sendú leit vnd kvmber swere·
seht die sint nv bereit·
sit dú liebe seldenb̾e·
mir ir hulde hat verseit·
seht da sprach si das ist erwant·
ich wil ivch mit guͤte minnen frǒwe nv gebt mir úwer hant·