Lieber botte nv wirbe alſo·
ſihe in ſchiere vn̄ ſage im das·
vert er wol vn̄ iſt fro·
ich lebe iemer deſte bas·
ſage im dvrh den willen min·
dc er iemer ſolhes iht getů da vō wir geſcheidē ſin·
Des er gert dc iſt der tot·
vn̄ v̾derbet manigē lib·
bleich vn̄ eteſwēne rot·
alſo verwet es dú wib·
mīne heiſſent eſ die man·
vn̄ moͤhte bas vnmīne ſin we im ders alrerſt began·
E das dv iemer im v̾ieheſt·
dc ich im holdes h̾ze trage·
ſo ſich dc dv alrerſt beſeheſt·
vn̄ v̾nim was ich dir ſage·
meī er wol mit trúwe mich·
ſwas im dāne mvge ze froͤiden komē daſ pꝛich·
Spꝛeche er dc er welle her·
dc ichs iem̾ lône dir·
ſo bitte in das ers v̾ber·
die rede dier ivngeſt ſpꝛach zv̊ mir·
ê dc ich in angeſehe·
wes wil er da mit beſweren mich dc niem̾ doch an mir geſchehe·