Lescha lesch verschamtú welt din laster rúchet dort·
vs diner heime in gastes 338r ǒgen·
din nahtgeberg· der tag vingerzeiget·
nv suͤne suͤne bekere dich flúch vf ein ander ort·
e· dich dú nacht dem tage vnreine der toren trost din ere veiget·
ir miete varwes lob dich trúgeliche schoͤnet·
swie dich paiat vs veilem mvnde habe gekroͤnet·
doh runet meister ernest din schame tvnkel varwen winkel werg·
sin spehe wachet dir zeschaden·
sin ǒgen dúrkelnt din geberg·
dv ganzer valsch begrifet er dich vor gerihte so wirst dv gehoͤnet·
Dv́ minne mag sich niht erwern man trage ir bilde wol· mit glichscheit vnd ǒch mit geberden·
liht an der stat da es ir versmahet·
sich pinet maniger durh dv́ wib valschlicher danne er sol·
da ist dv́ minne svnder schulde· si ist dort so er sich hie vergahet·
si leret niht ir frúnde ruͤmeliches trúten·
ir viende súre kan ich ú vil wol betúten si nimet ein tvmbe ruͤmig man vs lerem mv̊te in vollen mvnt·
vnd nietet sich mit rede ir namen ir schůl ist im niht hoher kvnt·
ir wafentrager die sint senftes mv̊tes vnruͤmig bi den lúten·