Leit machet sorge·
vil lieb wunne·
eines húbschen ritters gewan ich kunde·
dc mir den benomen hant· die merker vnd ir nit·
des mohte mir min herze· nie fro werden sit·
Ich stvnt mir nehtint spate an einer zinne
do hort ich einen riter vil wol singen
in kvrenberges wise· al vs der menigin·
er mv̊s mir dv́ lant rumen alder ich geniete mich sin·
Jo stvͤnt ich nehtint spate vor dinem bete
so getorste ich dich frǒwe niwet weken·
des gehâsse got den dinen lib·
io enwas ich niht ein eber wilde so sprach dc wib·
Swenne ich stan aleine in minem hemede·
vnd ich gedenke an dich ritter edele·
so erblůt sich min varwe· als der rose an dem dorne tv̊t·
vnd gewinnet dc herze vil manigen trurigen mv̊t·
Es hat mir an dem herzen vil dike we getan·
dc mich des geluste des ich niht mohte han·
noch niemer mag gewinnen· dc ist schedelich·
ione mein ich golt noch silber es ist den lúten gelich·