Lassen wir die blůmen rot beliben·
die sint verdorben des ist niht zelang·
singen von den minneklichen wiben·
nah einer ie min sendes herze rang·
dú sol sich bedenken bas·
in ir herzen ist dú liebe mir gehas·
dc wende vrowe ich diene dir iemer deste bas·
Ich hoͤre sagen im si wol zemv̊te·
der tǒgenlicher minne enpflege·
der sol sich nv warnen gegen der hůte·
ich han bi liebe nie gelegen·
da von enrůche ich wenne es tagt·
minen mv̊t ich wenden mv̊s von einer magt·
ia enrůche ich wc der wahter an der zinne sagt·
Liebes lieb gedenke an wiblich ere·
vnd wende mir min vngemach·
des han ich von tage ze tage ie mere·
sit ich dich vrowe alrerst an sach·
din vil rose varwer mvnt·
der hat in dc herze sere mich verwunt·
dc wende frowe alder ich bin iemer vngesvnt·