Jr nement es riches ſchiltes war·
den pꝛvͤuent oꝛdenliche dar·
in golde ein vf reht adelar·
hat vf der ſchilt geſtreket ſich·
ſeht das betútet hoch gebvrt die ſolten kv́nge han·
der adelar iſt ſwarz gevar·
ſin varwe iſt grúſenlich·
her kv́nig ich ſpꝛich v́ch númme dar·
wan fúrcht ǒch kleine dvnket mich·
ir gent frid als ein geſchúwe in einer gerſten ſvnder wan·
werint ir verſv̊cht als des adelars kindelin·
ſwels in die ſvnnē niht enſiht· das tv̊t er hin·
v́ch wer alſam geſchehen·
ir werint verwoꝛfen ald ir mvͤſſent reht vn̄ vnreht bas an ſehen·
kv́ng vn̄ adelar ſvnt hohe ſweiben das iſt ſleht·
her kv́ng nv ſeht·
das were des ſchiltes reht·
ſus ziet úch ritter vn̄ kneht·
ir klokent vmbe ir hvͤbel als vmbe einē fulen bǒn ein ſpeht·
ir ſint kerger danne der adelar der ſchilt der wil ich v́ch v́bel an ſtan·