Ir nement es riches schiltes war·
den prvͤuent ordenliche dar·
in golde ein vf reht adelar·
hat vf der schilt gestreket sich·
seht das betútet hoch gebvrt die solten kv́nge han·
der adelar ist swarz gevar·
sin varwe ist grúsenlich·
her kv́nig ich sprich v́ch númme dar·
wan fúrcht ǒch kleine dvnket mich·
ir gent frid als ein geschúwe in einer gersten svnder wan·
werint ir versv̊cht als des adelars kindelin·
swels in die svnnen niht ensiht· das tv̊t er hin·
v́ch wer alsam geschehen·
ir werint verworfen ald ir mvͤssent reht vnd vnreht bas an sehen·
kv́ng vnd adelar svnt hohe sweiben das ist sleht·
her kv́ng nv seht·
das were des schiltes reht·
sus ziet úch ritter vnd kneht·
ir klokent vmbe ir hvͤbel als vmbe einen fulen bǒn ein speht·
ir sint kerger danne der adelar der schilt der wil ich v́ch v́bel an stan·