Jch můs klagen das dv́ zit
ſich ſo gar verkeret hat·
ſecht wie heid vnd anger lit·
vn̄ wie der walt in tuften ſtat·
da man· e· hoꝛt vogellin ſang·
der klang· in tal in lv̊ften er ſchal·
ſvͤſſe ſtimme·
winters grimme·
tůt ſú ſwigen v́ber al
Was klag ich der vogeſlin ſang·
wā klag ich nit minen pin·
nach der ie min hertze rang·
das der iſt nit woꝛden ſchin·
minen kvmber den ich trag·
ich klag ir nicht mins hertzen not·
Die ich dulde ane ſchulde·
ich fv́rcht es tv̊ mir den tot