JArlang valwent vf der heide·
liehte blv̊men vnd kle·
winters grimme tet in leide·
kalde rifen vnd sne·
die enkvnnen mich betwingen·
in enwelle froͤlich singen·
der vil lieben núwen sang·
Wol mich dc ichs ie begvnde·
wol mich dc ichs ie gesach·
dú mir mines herzen wunde·
heilen kan vnd vngemach·
wil div liebe dc vol enden·
mit genaden trost mir senden·
seht so froͤit min herze sich·
Ia vil minneklichú minne·
zeige dine gvͤte an mir·
sit dv weist dc mine sinne·
dienent vf genâde dir·
fuͤge dc dú selderiche·
lone mir genedekliche·
ei was ich danne singen wil·