Jarlanc wil dú linde· von winde· sich velwen·
dú sich vor dem walde· ze balde· kan selwen·
truren vf der heide· mit leide· man vͤbet·
svs hat mir dú minne· die sinne· betruͤbet·
Mich hant sende wunden· gebvnden· zesorgen·
die mv̊s ich von schulden· nv dulden· verborgen·
dú mit spilnden ǒgen· vil tǒgen· mich seret·
dú hat min leit núwe· mit rúwe gemeret·
Genade frowe reine· dv meine· mich armen·
la dich minen smerzen· von herzen· erbarmen·
min gemvͤte enbinde· geswinde· von leide·
vs der minne fúre· din stúre mich scheide·