JArlanc wil dú linde·
velwen sich geswinde·
von dem leiden kalten sne·
meien ingesinde·
durh die scharpfen winde·
truret iemerlich als ê·
da gevilde· wilde· stůnt geroͤset·
da ist froͤide eroͤset·
von dem anger loͤset·
rife blv̊men vnd kle·
Swer bi liebe lege·
liht er sich bewege·
der vil schonen Svmerzit·
spilnder froͤide er pflege·
wan sin herze trege·
wurde vf vngemvͤte wit·
liebes kv́nne· wúnne· kan gemeren·
...
ob des meien eren·
der vns liehte blv̊men git·
Man sol reine frowen·
fúr die blv̊men schǒwen·
sit in wont vil tvgende bi·
Wie mag in den ǒwen·
iemer blv̊t betǒwen·
dú fúr truren besser si·
sendem manne· danne· wibes minne·
si kan mit gewinne·
wundes herzen sinne·
machen aller sorgen fri·