Jarlanc vrijet sich dú gruͤne linde
lǒbes vnd bluͤte gůt·
wunder guͤte blůt· des meien ê der werlte bar·
gerner ich durh liehte blv̊men linde·
húre in tǒwes fluͤte wůt·
danne ich wuͤte flůt· des rifen nv mit fuͤssen bar·
mir tv̊nt we die kůlen scharpfen winde·
swint· vertanes winter leit·
dur dc minem mv̊te sorge swinde·
wint· min herze ie kvme leit·
wand er kleiner vogellin froͤide nider leit·
Owe dc dú liebe mir niht dike·
heilet miner wunden fvnt·
ich bin fvnden· wunt· von ir· nv mache si mich heil·
sendes truren lanc breit vnd dike·
wirt mir zallen stvnden kvnt·
wil mir kvnden stunt· gelúkes so vinde ich dc heil·
dc si mich in spilnde froͤide kleidet·
leit· an mir niht lange wert·
ir gewant min vngemvͤte leidet·
kleit· nie wart so rehte wert·
so dú wat der mich dú herzeliebe danne wert·
Welt wilt du nv zieren dich vil schone·
so gib dinen kinden· wint·
der niht winden· kint· zvneren mvge dest min rat·
swer mit stete diene dir des schone·
hilf im sorge binden· vint·
die dich vinden· bint· si zv̊ dir gib in hordes rat·
reinú wib den rat· mein ich zegv̊te·
mv̊t· vnd zuht ist in gewant·
swen si kleident mit ir reinem mv̊te·
gv̊t· vnd edel dc gewant·
ist dar vmbe ich vs ir dienste mich noch nie gewant·