JArlanc von dem kalten sne·
valwent blv̊men vnd kle·
me· siht man gruͤnes lǒbes in dem walde niht·
schowent wie der anger ste·
iemerlichen aber als ê·
we· manigem kleinen vogellin da von geschiht·
manicvalter sorgen schar·
twinget dc gevilde·
wilde· rosen lieht gevar·
sint verswunden alzegar·
bar· wunneklicher blvͤte man die bǒme siht·
Swer bi liebe svnder nit·
dise lange winterzit·
lit· der vergisset wol der svmerlichen tage·
wan im ane widerstrit·
minne hohgemvͤte wit·
git· vnd machet ringe sines herzen klage·
wibes minne meret bas·
froͤide sendem manne·
danne· kle von tǒwe nas·
wissent svnder allen has·
dc· wibes minne kvmber vnd leit veriage·
387v Wib sint gůt fúr vngemach·
wibes trost ie sorge brach·
swach· vnd kleine machet truren wibes lib·
wib sint lieber dinge ein tach·
dc man liebers nie gesach·
ach· got wie selig sint dú minneklichen wib·
wiplich gvͤte sanfte tůt·
man sol gůte frowen·
schowen· fúr des meien blůt·
wib sint gv̊tes vber gůt·
mv̊t· reiner wibe mag wol heissen leit vertrib·