Jarlanc scheiden·
wil dú linde·
von ir kleiden· gruͤnen so geswinde·
dc si lǒbes ane wirt·
vf den heiden· von dem winde·
froͤide leiden· mv̊s dem ingesinde·
dc der sv̊sse meie birt·
die not min herze klaget·
niht so túre· sam die schulde·
dc mich húre· miner frowen hulde·
twinget vnd in truren iaget·
Ich geliche· mine frowen·
sicherliche· rosen in den ǒwen·
die der liehte meie lat·
wunnekliche· da betǒwen·
vnd in riche· varwe git dvr schǒwen·
dú doch schiere ein ende hat·
reht alsam der blv̊men schin·
vor dem walde· wirt gevelwet·
also balde truͤbet vnd selwet·
sich dú liebe frowe min·
IR vil svͤsse· werde minne·
leiden mvͤsse· mir noch vsse vnd inne·
so dc si zekeiner stunt·
truren buͤsse· minem sinne·
wand ir gruͤsse· tv̊nt mit vngewinne·
mich an wernder froͤide wunt·
ir lon ist iamers vol·
vnd ir ende· truric sere·
missewende bieten kan ir lere·
we dc ich ir dienen sol·